حسنو کیہ مثالو دیاوا مہ خوبانو لو دی بوئ

مہ خوش نصیبیو بابہ تو اوانو لو دی بوئ


مورخ نوغورو نسین ہمیشہ غیردی نو گوئ

 کی غلام گردشو لو ہوئ بے مکانو لو دی بوئ


مضمونہ بہشٹ نیویشی نیویشاک ورق نو دوئ

حاشیا ای جو کٹاکہ تہ شرانو لو دی بوئ


اطلس و کمخواب تہ چلائ ہیتان تذکرہ کی ہوئ

مہ دی دسے دریرو زپان بخ اوانو لو دی بوئ


مہ غزل انمول غیرونیان، تہ ذکرو کوری انگوم 

 شہرہ تہ ہستیو کی ہوئ مہ عرفانو لو دی بوئ


یک رنگی فطرتو خلاف ہر میوو تنہا ای خال

کی ہوئ گلستانو ذکر بیابانو لو دی بوئ


ظلمو تان حسابو گنیر ہتو بونی چمور قف

تہ اعمال نامو سم جستہ بیابانو لو دی بوئ


مہ اشرو بوشیکو قطرہ مہ ذوقوتے رنگ دونیان

کی آسمان شیݯیکو چق ہوئ تھے درون ہانو لو دی بوئ


رانجھا پریشان نو بیتی خیرو توقعو کو 

جزا و سزو انوسو تہ زیانو لو دی بوئ


نصیب رانجھا